Әз-Ағаң да өтті өмірден

2011 жылы ақпанның 12 күні 89 жасқа қараған шағында жазушы-журналист, Қазақстанның халық жазушысы, Мемлекеттік сыйлықтың лауреаты Әзілхан Нұршайықов дүниеден озды.

Әзілхан Нұршайықов 1922 жылдың 15 желтоқсанында бұрынғы Семей облысы Жарма ауданының Ақбұзау ауылында дүниеге келген. Ауылдағы орталау мектепті бітіргеннен кейін, Алматыдағы Тау-кен институтының жұмысшы факультетінде, Семейдегі Абай атындағы қазақ педагогикалық училищесінде, одан кейін педагогикалық институтында оқыды.

ІІ дүниежүзілік соғысына қатысқан. Соғыс кезінде жазушы‑майдангердің өлеңдері, әскери әңгімелері мен очерктері майдандық, республикалық және облыстық газет беттерінде жиі басылып тұрды.

Әзілхан Нұршайықов еңбек жолын мұғалім болып бастаған. 1947-48 жылдары Семей обл. “Екпінді” газетінде тілші, жауапты хатшының орынбасары, 1948-49 жылдары “Қазақстан пионері” газетінде бөлім меңгерушісі, 1949-53 жылдары “Социалистік Қазақстан” газетінде әдеби қызметкер, жауапты хатшының орынбасары, бөлім меңгерушісі, 1953-56 жылдары Павлодар обл. “Қызыл Ту” газетінің редакторы, 1956-61 жылдары “Социалистік Қазақстан” газетінің Павлодар облысындағы меншікті тілшісі, редактордың орынбасары, 1961-63 жылдары “Қазақ әдебиеті” газетінің бас редакторы, “Социалістік Қазақстан” газетінде әдеби қызметкер, бөлім меңгерушісі, 1968-73 жылдары Қазақ совет энциклопедиясы бас редакциясында бөлім меңгерушісі, 1973-79 жылдары ҚР Ғылым академиясының Әдебиет және өнер институтында ғылыми қызметкер болып істеген.

Көп жылдар Қазақстан Жазушылар одағы проза кеңесінің, жас әдебиетшілер кеңесінің төрағасы қызметін атқарған. Әзілхан Нұршайықов шығармашылық жолын ақын және публицист ретінде бастаған.

Тың игерушілер өміріне арналған алғашқы очерктер жинағы “Алыстағы ауданда” 1956 жылы жарық көрген. Оның осы тақырыпқа арналған очерктер мен әңгімелер жинақтары “Тың астығы” 1958 жылы, “Ертіс жағасында” 1959 жылы, “Махаббат жыры” (1964), “Әсем» ( 1966), “Жомарт өлке” (1967), “Махмет Қайырбаев” (1967), “Батырдың өмірі” (1969), “Тоғыз толғау”( 1977), “Невель түбінде” (1977), “Автопортрет” (1977), “Екі естелік” (1985) жарияланды.

“Махаббат қызық, мол жылдар” романы (1970) мен “Ақиқат пен аңыз” роман‑дилогиясы (1973) жазушы шығармашылығының шырқау биігі . “Ақиқат пен аңыз” роман‑дилогиясы ү<span style=”mso-bidi-font-family: Calibri;”>шін Әзілхан Нұршайықовқа 1980 жылы Қазақ КСР-інің Абай атындағы Мемлекеттік сыйлығының лауреаты атағы берілді.

Бірқатар шығармалары қырғыз, өзбек, тәжік, молдован, татар, якут тілдеріне тәржімаланған. Халыққа өлмес туындылар сыйлаған жазушының мол мұрасы халық жадында мәңгілік қалары сөзсіз. Бақұл бол, Әз-Аға, жаның жанатта болсын! «Мінбер.кз»