Фото: markirovka.ismet.kz
Қазақстанда 2024 жылдың 1 шілдесінен кейін өндірілген барлық дәрілік зат міндетті түрде таңбалануы тиіс.
Былтыр Үкімет «Таңбалануға жататын тауарлар тізбесін айқындау туралы» қаулыға өзгеріс енгізді.
Қаулыда:
– 2024 жылғы 1 шілдеден бастап – ветеринарияда қолданылатын дәрілік заттар мен вакциналарды қоспағанда, 2024 жылғы 1 шілдеден бастап өндірілген, дозаланған дәрілік нысандар түрінде (трансдермалық жүйелер нысанындағы дәрілік заттарды қоса алғанда) немесе бөлшек саудаға арналған қалыптарға немесе орамдарға өлшеп оралған дәрілік заттарға қатысты міндетті таңбалау, – деп жазылған.
Жаңа қадағалау тетігі дәрінің зауыттан бастап дәріханада сатылуына дейінгі бүкіл жолын қамтиды. Денсаулық сақтау министрлігі жүйенің қалай жұмыс істейтінін түсіндіріп берді.
Таңбалауда қандай ақпарат жазылады?
Дәрілік заттарда бірегей Data Matrix коды болуы тиіс. Енді әр сатып алушы «Naqty Onim» қосымшасы арқылы кодты сканерлеп, дәрінің түпнұсқалығы мен заңдылығына көз жеткізе алады.
Таңбалау дәрі-дәрмек туралы толық ақпарат жазылады. Атауы, саны, дозасы, өндірушісі және қозғалыс жолы.
Дәрілерді кім таңбалауы керек?
Өндірушілер, импорттаушылар, дистрибьюторлар, дәріханалар мен медициналық ұйымдар – дәрілік зат айналымына қатысушылардың барлығы Тanba тауарларды таңбалау мен қадағалау жөніндегі бірыңғай оператор жүйесіне тіркеледі.
Тіркелгеннен кейін оларға жеке кабинет ашылады, онда таңбалау кодтарымен жұмыс жүргізіліп, препаратардың барлық кезеңдегі қозғалысы көрсетіледі.
Ал «Қазақстан Республикасында уақытша болатын шетелдіктер мен азаматтығы жоқ адамдарға жеке сәйкестендіру нөмірін беру және түзету қағидалары» туралы бұйрыққа сәйкес, шетелдік өндірушілер де отандық компаниялармен тең дәрежеде таңбалау жүйесінде өз бетінше жұмыс істей алады.
Бұдан бөлек, шетелдік компания үшін бірегей кодтарды қазақстандық импорттаушы да тапсырыспен ала алады.
Таңбалау және қадағалау жүйесі қалай жұмыс істейді?
Дәрілік заттарды айналымға енгізбестен бұрын өндіруші Бірыңғай оператордан бірегей Data Matrix кодтарын тапсырыс беріп алып, оларды қаптамаға жапсырады. Осылайша дәрілер туралы ақпарат таңбалау және қадағалау ақпараттық жүйесіне түседі.
Дәрілік заттардың айналымындағы екінші буын – импорттаушылар мен дистрибьюторлар. Бұл кезеңде айналымның қатысушылары алдын ала таңбаланған препараттарды алады. Егер код оқылмаса немесе жүйеде тіркелмесе, мұндай препаратты сатуға немесе пайдалануға рұқсат етілмейді.
Қазақстанда дәрілік заттарды таңбалау тізбегінің соңғы кезеңінде дәріханалар мен медициналық ұйымдар тұр.
Препараттарды соңғы тұтынушыға – сатып алушыға немесе пациентке дәл осы жерде беріледі. Әр кезең Бірыңғай оператор жүйесінде есеп арқылы бірге жүреді.
Дәріханалар мен медициналық ұйымдар пайдаланатын жүйелер тауарларды таңбалау және қадағалау ақпараттық жүйесімен біріктірілген. Препаратты сатқаннан немесе пациентке бергеннен кейінгі ақпарат Бірыңғай оператор жүйесіне жіберіліп, дәрілік зат айналымнан шығарылады.
Динара Насыр
Парақшамызға жазылыңыз
