2025 жылы желтоқсан айының 21 күні қазақтың аса көрнекті актері Асанәлі (Әшімов) 88 жасында қайтыс болды. Жан рухы шат, Топырағы торқа болсын! Осы қазанама хабарланысымен қазақтың тағы бір көрнекті әртіс-актері Тұңғышбай Жаманқұлов әлеуметтік желіде марқұммен қоштасу-бақұлдамасын жедел жариялады. Оқырмандарымызға ой тастау үшін Т.Жаманқұловтың осы “қоштасу сөзін” ұсынып отырмыз.
«Асқар тауымыз едің – аласармадың… Аспанға кеттің… Мәдиіңді ойлап мұң байладың… Сағиыңды сағынып сал шекпен жамылдың… Қатарыңнан жалғыз едің – соңдарынан кеттің… Қатарымнан жалғызбын – арттарында қалдым…. Ағалық жасап арқамнан қақпадың – әлжуаздықтан сақтадың…Көкем болып, көңілімді өсірмедің – кішілігім кем боп жақпадым… Жерлес ретінде жығылғанымда жебемедің – өз күшіме сендірдің… Сүйеніш болмадың – жансірілікке үйреттің… Тірегім болмадың – табаным таймастай тағаладың… Белімді бумадың – бекемдікке баулыдың… Алдымда жүріп, адымымды ұзарттың… Соңыңда қалдырмадың – ізіңде жүргенімді сездің… Қатарымды тептің… Тізеңді батырдың – Мен кештім… Биіктігіңе пара-пар, Пенделігіңді көрдім – Өзің де кеш… Өкпеге қисам да, Өлімге қимадым… Сары уайым – Сағынышқа айналдың…
Қош… Бақыл бол…» деп жазды Т. Жаманқұлов.
Дерек көзі (Тұңғышбай Әл-Тарази ФБ парақшасынан алынды)
Парақшамызға жазылыңыз
