Фото: istockphoto.com
Бүгін бала құқықтары жөніндегі уәкіл Динара Зәкиева Президенттің қабылдауында болды. Ол бала құқықтарын қорғау және жас ұрпақтың денсаулығын сақтау мен нығайту бағытында атқарылған жұмыс туралы айтып берді.
Динара Зәкиева биыл 13 өңірдегі және 73 елді мекендегі ахуалға мониториң жүргізілгенін, соның ішінде 272 мекемедегі балаларға жасырын сауалдама жасалғанын, 173 отбасыда тәрбиеленіп жатқан жеткіншектердің жағдайымен танысқанын айтты. Тексеріс қорытындысы бойынша бала құқықтарын қорғауға қатысты қабылданған заң нормаларын бұзған 171 дерек анықталған.
Бала құқықтары жөніндегі уәкілдің бастамасымен балалардың құқықтарын қорғауға қатысты заңнамаға 120 түзету енгізіліпті.
Президент бала құқықтарын қорғауға кепілдік беру жүйесін нығайтып, жеткіншектерді жан-жақты қолдау тетігін қалыптастыру үшін жергілікті атқарушы органдар мен өңірлік уәкілдердің күш-жігерін жұмылдыру маңызды екеніне назар аударды. Бұдан бөлек, мектептердегі инклюзивті білім беру ісін дамытуды көздейтін қосымша шаралар қабылдауды тапсырды.
minber.kz
