Алматыда құрылыс саласындағы мемлекеттік сатып алуларға қатысу кезінде жалған мәліметтер пайдаланған деген күдікпен бір топ адамға қатысты сотқа дейінгі тергеу жүргізіліп жатыр.
Тергеу дерегінше, 2021–2024 жылдар аралығында қылмыстық схемаға қатысушылар жалған компаниялар арқылы тендерлердегі рейтингін көтеру үшін қолдан жасалған құжаттар мен жалған мәліметтерді пайдаланған. Ұйымдастырушылар мұндай «қызмет» үшін 500 мыңнан 1,5 миллион теңгеге дейін сыйақы алған. Заңсыз жолмен алынған кіріс көлемі 664 миллион теңгеден асқан. Бұл қаражатқа 11 автокөлік пен 12 жылжымайтын мүлік нысаны (5 тұрғын үй, 7 жер телімі) сатып алынған.
Тергеу болжамынша, осы заңсыз әрекеттердің арқасында жалпы құны шамамен 70 миллиард теңгені құрайтын келісімшарттар бірқатар ұйымдармен жасалған. Қазіргі таңда төрт күдікті қамауға алынып, тергеу изоляторына жеткізілді.
Тергеу жалғасып жатыр. ҚІЖК-нің 201-бабына сәйкес, өзге мәліметтер жария етілмейді.
Парақшамызға жазылыңыз
