Кеше Алматыда Әбілхан Қастеев атындағы Қазақстан Республикасының мемлекеттік өнер музейінеде қазақтың кесте өнерінің хас шебері Зейнелхан Мұхаметжан мен оның жұбайы Гүлжай Құсман, баласы Ботакөз Зейнелханның Отбасылық біріккен шығармашылық “Жады” атты көрмесі өтті.
Қазақтың ұлттық кесте өнерінің заманауи үлгісін жасап, дамытып оны кестеленген кескіндеме дәрежесіне жеткізіп, көне қазақ дәстүрінің жаңа үлгісін жасаған жасампаздық жетістіктерін көріп, тамашалап, таңдай қақтық. Өйткені, өркениеттің өр биігіне шығып алып, айналасына менменсіп қарайтын мынау XXI адамзат баласын әлде немен таңқалдыру, жаңа жол табу немесе қандай бір жаңалық ашу өте қиын екенін баршаңызға белгілі. Ал оған қол жеткізу үшін жүйрік қиял, ұшқыр ой, өнер тапқыш қабылет, табанды еңбек қажет. Міне осы үрдістен шыққан адам Зейнелхан екен және оның отбасылық біріккен шығармашылық тобы. Біз осыған тәнті болдық.
Және кеш барысында Зейнелхан Мұхамеджанның қолданбалы сәндік өнер кестелі кескіндеме суретті альбом кітабының тұсауын кесті. Кітап үш тілде қазақ, орыс, ағылшын тілдерінде жарық көрген. Кітаптың аңдатпасында «Зейнелхан Мұхаметжан қазақтың дәстүрлі біз кесте өнерін жаңа интерпретацияда қолданып, кейін оны қазіргі қазақ бейнелеу өнерінің жаңа түрі ретінде қалыптастырды. Бұл альбомға оның әр жылдары жасалған туындылары енгізілді» делінген. Кітапта Зейнелхан Мұхаметжан еңбектерін өнерзерттеу ғылымдары әр қырынан терең талдап аса жоғары баға берген.
Minber.kz ақпарат атынан – Қарамер.
Парақшамызға жазылыңыз
