Қазақ тәуелсіздігінің бастауы болған, Қазақ автономиясының құрылғанына 100 жыл

Осы аптада Қазақ автономиялы Советтік Социалистік республикасы туралы Ленин, Калинин және Енукидзе қол қойған декреттің шыққанына 100 жыл толады. бүгінгі тәуелсіздіктің бастауы осыдан 100 жыл бұрын қаланғанын бірі білсе, бірі білмейді. Бұл декрет – Совет өкіметінің қазақ халқының автономия алу құқын және оның шекарасын ресми мойындаған құжат. Осы тарихи құжаттың қабылдануына Алаш арыстарының қосқан үлесі ерекше. Әсіресе, сол кезде 29 жастағы Әлімхан Ермеков Лениннің алдында арнайы баяндама жасап, Қазақ елінің ұланғайыр территориясын дәлелдеп, комиссия мүшелерінің ешқайсысы қарсы пікір айта алмапты. Сол Әлімхан Ермеков кім еді? Ол туралы былайғы жұрт неге біле бермейді. Филология ғылымдарының докторы, профессор, белгілі Алаштанушы ғалым Айгүл Смақовамен әңгімеміз осы төңірегінде өрбіді.