Бүгін Фейсбуктің қазақ сегменті ҚР Парламенті Мәжілісінің экс-депутаты Бекболат Тілеуханның мерзімінен бұрын өкілеттігін тоқтатқандығын және осыған орай журналистердің сауалдарына жауап беру барысында журналист Айнұр Коскинамен арада дау туындағанын жазып жатыр.
“Азаттық” радиосы журналист Айнұр Коскинаның экс депутаттың үстінен “журналистің қызметіне кедергі келтіру” бабы бойынша, сотқа шағым түсіргенін жазады. Бұл жерде қазақ журналистері үшін есіктен ғана сығалап жүрген журналистік этиканың қылтиып тұрғанын айтпасқа болмайды.
Көптеген пікірлерді қарасаңыз, “журналист кез келген сауалды қоюға құқылы” дегенге саяды екен. Әрине, журналистердің негізгі мақсаты қоғамды ақпараттандыру. Бірақ, қандай ақпаратты жеткізуі тиіс? Саясаткердің жеке өмірі, жеке қызығушылығы, діни көзқарасы, туған-туыстарымен қарым-қатынасына қол сұғылмауы тиіс. Бірақ, бұл жеке өмір, отбасылық қарым-қатынасының қоғамдық мүддеге қатысы бар ма? Сіздің тарататын ақпаратыңыз үнемі қоғамдық мүдде тұрғысынан туындауы керек. Осы тұрғыдан әріптесіміз Саясат Ідеятұлының фейсбук парақшасындағы мына бір пікіріне құлақ асып көрелік:
Мен журналистің “қарғыс” туралы сұрағын қолдамасам да, зайырлы мемлекеттің Парламент мүшесінің зайырлы елдің заңына қайшы көп әйел алу туралы сұрағын қоғамдық мүдде тұрғысынан туындаған мәселе дер едім. Бекең өзінің бірнеше әйелі бар екенін жасырмайтынын айтыпты. Демек, көп әйелі бар адамның шариғат басқаратын елде емес, Конституция төрелік ететін елде Парламенттің төрінде 3-4 рет сайлануы және оған атқарушы биліктің көз жұма қарауы ойландырарлық мәселе. Яғни, бұл бірнеше әйелі бар келесі үміткерлерге де Парламентте жол ашық дегенді білдірсе керек. Сол себептен, журналист кез келген сауалды қоя алады. Бірақ, ол сауал қоғамдық мүдде тұрғысынан туындауы керек деген ұстанымды басшылыққа алғанымыз дұрыс болар еді.
Парақшамызға жазылыңыз
[…] соңы журналистің экс депутатты сотқа беруімен аяқталған […]