«Біздің есіміміз Абылайхан және Жарас, Павлодар қаласының Дерибас көшесіндегі №12/1 үйде тұратын оқушылармыз.
Жақында сіздердің біздің қалаға келетініңіз жөнінде естіп, өзіміздің арманымыз жөнінде жазғымыз келді. Ауламызда Астана мен Мәскеудегіден кем түспейтін ойын алаңы пайда болып еді. Сол алаңды бір жаман адамдар заңсыз иеленіп алды да, оны бетонмен қоршап, үй мен гараж салды. Барлық қоқыс контейнерлерін ауланың ортасына әкеліп қойды. Одан шыққан сасық иіс, бүлінген жол, сынған шамдардан бізде ойнау былай тұрсын, демалып отыруға мүмкіндік қалмады. Бізге өз ауламыздың мұндай жағдайға жеткенін көру өте ауыр тиюде. Ауламызды үлкен кісілердің заңсыз әрекетінен қорғауға біз әзірше жаспыз.
Құрметті президенттер, біздің әдемі ауламызды қайтарып беруге көмектесіңіздер. Санап көрдік, бұл жерде жүзден аса бала бар екенбіз. Олардан ауламызды сақтау жөнінде қолдарын жинауға біз дайынбыз. Үніміз сіздерге ертерек жетсе екен деп тілейміз.
Нұрсұлтан Әбішұлы, Владимир Владимирұлы, біз сіздерді өте құрметтейміз. Сондықтан жанайқайымызды естігеннен кейін бізге қонаққа келіңіздер».
Бұл хатқа Жарас, Абылайхан, Денис, Алан, Ислам есімді балалар қол қойыпты.
Ешкім хатта жазылғандарды бұрыс дей алмаса керек. Көпқабатты үйлердің ауласын жекеменшікке айналдырып, үй, дүкен салып алғандарды тек Павлодарда ғана емес, еліміздің басқа қалаларынан да кездестіруге болады. Олар өздерінің бұл істері үшін қариялардан да, балалардан да ұялмайды.
Егер павлодарлық оқушылар хат жазыпты деп Н.Назарбаев төмендегілерге тапсырма берер болса, оған тек қуану керек шығар. Бірақ хаттың екінші данасы неге Ресей президенті В.Путинге жолданды, мәселе осында. Біздің ішкі мәселемізді шешуге көмек сұрайтындай В.Путин Қазақстанның президенті ме? Әлде павлодарлық оқушылар Ресейдің президенттері Қазақстанның ішкі істеріне араласады деп ойлай ма екен? Демек, балалар солай деп хат жазса, үлкендерден бір әңгіме естіген болар. Қазақстанның солтүстігіндегі облыстарда кейбіреулердің бүйрегі Ресейге бұрып тұратыны осыдан-ақ белгілі емес пе?
Қазақстанның тәуелсіздік алғанына таяуда жиырма бір жыл толады. Ал бізде кейбіреулер әлі күнге дейін Ресейге қарап көзін сүзгенін қоймай келеді…
Қ. БАСТАУ
“Замана” газеті
Сурет: dayevents.ru
Парақшамызға жазылыңыз
не дейміз енді !!! жөнделер, түзелер балким” мүмкин керек болса тағы да жиырма жылдай күтейик . ен бастысы сабырлылық