//

“Музарттың” 20 жылдығына арналған концертті өткізу үшін бөлінген 30 миллион теңгеге Сәкен Майғазиев қол қойған

4545 рет қаралды
Журналист, желі белсендісі Мият Кәшібай “МузАрт” тобының 20 жылдық концертін Шымкентте өткізу үшін Мемлекеттік сатып алулар порталындағы келісім шартқа сол топтың мүшесі Сәкен Майғазиевтің қол қойғанын жазады: “Мені таңғалдырған тағы бір жайт. Наурыз мерекесіне орай Шымкетте МузАрт тобының да концерті өтіпті. Бюджет қаржысына. “Мейлі, өте берсін. Салық төлеуші халық. Ал МузАрт тобы – халықтың сүйіктісі” дейтін шығарсыздар. Мәселе ода емес. Ол концертті өткізуге тапсырыс беруші мекеме – Шымкент қалалық мәдениет үйін МузАрт тобының әншісі Сәкен Майғазиев басқаратыны белгілі. МузАрт концерті үшін жасалған 30 миллиондық келісім шартқа да Майғазиевтың өзі қол қойған. Порталда тұр.
Елімізде Сыбайлас жемқорлыққа қарсы іс-қимыл туралы заң бар. Соның 15-бабында мүдделер қақтығысы жайлы айтылған. Ал мен бұл жоғарыдағы келісім шарттан мүдделер қақтығысын байқап отырмын. Сәкен Майғазиев өзі ән айтатын топтың концертін өткізу үшін өз басқаратын мекемеден ақша бөліп отыр. Өзі сол концертте өнер көрсеткені тағы бар. Заңгерлер не дейді екен бұл туралы, мүдделер қақтығысы байқала ма?” десе Zertteu-Research қоғамдық қорының сарапшысы Ғалымжан Оразымбет мемлекеттік сатып алулар туралы заңның 6-бабынан үзінді келтіреді:
“6-бап. Мемлекеттік сатып алуға қатысуға байланысты шектеулер
1. Әлеуетті өнім беруші, егер:
1) осы әлеуетті өнім берушінің БІРІНШІ БАСШЫЛАРЫНЫҢ және (немесе) осы әлеуетті өнім берушінің уәкілетті өкілінің жақын туыстары, жұбайы (зайыбы) немесе жегжаттары ӨНІМ БЕРУШІНІ ТАҢДАУ ТУРАЛЫ ШЕШІМ ҚАБЫЛДАУ ҚҰҚЫҒЫНА ИЕ БОЛСА не өткізілетін мемлекеттік сатып алуда ТАПСЫРЫС БЕРУШІНІҢ немесе мемлекеттік сатып алуды ҰЙЫМДАСТЫРУШЫНЫҢ өкілі болып табылса”.
Егер бұл тендерді сарапқа салып көрсек, қызметтің атауы “Наурыз мерекесіне орай “МузАРТ” 20 жыл: “МузАРТ”; әсем әндерін әнші достарымен бірге шырқайды, іс-шарасы” деп аталады. Келісім шарт бір көзден сатып алу арқылы жүзеге асырылған. Тапсырыс беруші Шымкент қаласы мәдениет, тілдерді дамыту және архивтер басқармасының “Шымкент қалалық мәдениет үйі” концерттік ұйымы” мемлекеттік коммуналдық қазыналық кәсіпорны, өнім беруші “Сапфир Медиа” жауапкершілігі шектеулі серіктестігі. Техникалық сипаттамасында да осы жалғыз ауыз сөйлем жазылған. “Сапфир Медиа” ЖШС мемлекеттік сатып алулар порталында 2020 жылдың қыркүйегінде тіркелген. Жетекшісі Бәденова  Анель  Сырымқызы, 23 жаста. Мекеме – Нұр-Сұлтан қаласында тіркелген. Statsnet сайтының мәліметі бойынша, мекеменің айналысатын қызмет түрі басқа топтамаларға енгізілмеген өзге дербес қызметтерді ұсыну.
Бұл мекемемен келісім шартқа қол қойған Сәкен Майғазиев “Мен “МузАрт” тобымен тікелей келісім шарт жасамадым. Мен “Сапфир Медиа” ЖШС-імен келісім шарт жасастым” деуі әбден мүмкін ғой. Алайда келісім шарттың техникалық сипаттамасында да, келісім шарт та да “МузАрттың” 20 жылдығына концерт өткізу туралы айқын жазылып тұр ғой. Бүгінгі өткен брифингте бұл сауалдарға нақты жауап болмады.
Парақшамызға жазылыңыз

Жауап беру

Your email address will not be published.

This site uses Akismet to reduce spam. Learn how your comment data is processed.

Соңғы жазбалар