Үкімет бір жыл бұрын бас тартқан тәжірибесіне қайта оралды. 2027 жылғы республикалық бюджетте Ұлттық қордан нысаналы трансферт қайта қарастырылды. Вице-премьер, ұлттық экономика министрі Серік Жұманғарин бұл қаражат не үшін қажет екенін түсіндірді. Бұл туралы Tengrinews.kz хабарлайды.
Кепілдендірілген және нысаналы трансферт: айырмашылығы неде?
2027 жылғы бюджетте Ұлттық қордан трансферттің екі түрі көзделген: көлемі 2,4 трлн теңге болатын кепілдендірілген трансферт және 2 трлн теңгелік нысаналы трансферт.
Кепілдендірілген трансферт жыл сайын бюджет шығыстарын, соның ішінде әлеуметтік міндеттемелерді жабуға бөлінеді. Ал нысаналы трансферт нақты бір міндеттерді шешуге арналады.
Еске сала кетейік, Ұлттық қор – мұнай, газ және басқа да пайдалы қазбаларды сатудан түскен табыс жинақталатын мемлекеттік әл-ауқат қоры. Оны Ұлттық банк басқарады. Бір жыл бұрын Үкімет нысаналы трансферттерден бас тартатынын мәлімдеген еді. Алайда 2027 жылғы бюджетті жоспарлау кезінде бұл тәсіл қайта енгізілді.
«Он жылда емес, екі жылда»
Серік Жұманғариннің айтуынша, Үкімет Ұлттық қор қаражатын пайдалану тәсілін өзгертуде.
«Биыл және келесі жылы Ұлттық қор активтерін пайдаланудың жаңа логикасы қалыптасып жатыр. Бұл қаржылық капиталды ұлттық капиталдың басқа түріне айналдыру», – деді вице-премьер.
Министр Ұлттық қорды пайдалануды әлеуметтік маңызы бар нысандардың құрылысын жеделдету қажетімен түсіндірді. Аурухана, мектеп, театр және спорт кешендерінің құрылысы ондаған жылға созылмауы керек.
«Бұл нысандарды Ұлттық қорға тиіспей 10 жылда салуға болады, не болмаса екі жылда салып, халыққа қазір беруге болады», – деді ол.
Қаражат қайда жұмсалады?
Жұманғариннің мәліметінше, Инфрақұрылымды дамыту қоры арқылы жалпы құны 5,7 трлн теңге болатын 483 жоба мақұлданған.
Денсаулық сақтау. Бұл салаға 422 млрд теңгеге 61 жоба тиесілі. Олардың қатарында 10 перинаталдық орталық пен перзентхана, 20 аурухана, 12 емхана және 5 жедел медициналық жәрдем орталығы бар. Сонымен қатар Астана, Алматы және Өскемен қалаларында ірі медициналық нысандар салынады.
Білім беру. Бұл салаға 225 млрд теңгеге 61 жоба бекітілді. 41 мектеп пен лицей, 12 мектепке дейінгі ұйым және Астанада көпфункционалды кешен салу жоспарланған. Вице-премьер бұл қажеттілікті халық санының жылдам өсуімен байланыстырды.
Мәдениет. Мәдениет саласындағы 12 жобаға 100,6 млрд теңге бөлінеді. Олардың ішінде Қызылордадағы 35 млрд теңгелік драма театры, Атыраудағы өңірлік мұрағаты бар Бейбітшілік және келісім сарайы (21 млрд теңге) және Таразда салынатын 1300 орындық концерт залы (18,5 млрд теңге) бар.
Спорт. 34 спорт жобасына 240 млрд теңге қарастырылған. Петропавлда 12 мың орындық стадион, спорт аренасы мен мұз кешені салынады. Сондай-ақ Қостанай бастаған бірнеше қалада спорт сарайлары бой көтереді.
Көлік. Ең ірі үлес көлік саласына тиесілі. Мұнда жалпы құны 2,2 трлн теңге болатын 133 жоба бар. Жұманғарин солардың ішінде Астанадағы LRT-ның екінші кезеңін және Алматы метросының үшінші кезеңін атап өтті.
Айта кетейік, бұған дейін Үкімет отырысында Қаржы министрлігі 2027 жылға арналған республикалық бюджет жобасын таныстырған болатын.
Дереккөз: TengriNews.
Парақшамызға жазылыңыз
