Шынжаң Бурылтоғай ауданындағы қазақ орта мектебінің қыздар командасы Швецияда өткен халықаралық өспірімдер футбол додасына қатысып қайтты. Сәуір айында Қытайдың әр өлкесінен сараланған аяқдопшылардың ішінен қара үзіп шыққан қазақтың қаракөз бүлдіршіндері әлемдік жарысқа жолдаманы жеңіп алған болатын.
Еуропа төріне аттанған қарындастарымыз екі жеңіс, екі жеңіліс есебінде алдыңғы сегіз мықтының қатарына таба тіреп, футбол сапарларынан қайта оралды. Миллиард қытайдың ішіндегі миллион қазақтың кішкентай ауылына үлкен жеңіс марапатын сыйлаған Жетіарал мектеп-интернатының бәсекелі аладоп бас кейіпкерлеріне біз әрқашан сәт сапар тілейміз!
