ҚР Әділет министр Қанат Мусин БАҚ өкілдерімен кездесу барысында Қазақстанның бұрынғы президенті Нұрсұлтан Назарбаев отбасының елден шығарып алып кеткен капиталы жайында тергеу жүргізуге болатындығын, алайда оларды қылмыстық жауапқа тарта алмайтынын мәлімдеген.
«Заң бұл отбасын қылмыстық жауапқа тартудан қорғағанымен, зерттеу жүргізуден қорғамайтыны мәлім. Мен заңда қалай жазылғанын айтып отырмын. Алайда, онда қылмыстық жауапкершілікке тартуға болмайтыны айтылады, бірақ зерттеу жүргізуге тыйым салынбаған, – дейді Мусин.
Бұл туралы Vlast.kz басылымы хабарлаған.
Әділет министрлігі Қазақстанда заңды өзгерту бастамасын Мәжіліс, президент және үкімет қана көтере алатындығын айтады. Тек биліктің осы үш бұтағы І президент туралы заңды өзгерте алады дейді ол. Оның ойынша бұл заңды өзгерту тек заңдық тұрғыдан ғана емес, сонымен қатар моральдық тұрғыдан да қиын.
“Өйткені, осыдан отыз жыл бұрын Қазақстанның бүгінгідей деңгейде болмағанын ешкім жоққа шығара алмайды ғой. Солай ма? Остап Бендер айтқандай бұл жалпыға белгілі жағдай. Қандай да бір заңды өзгерту қажеттілігі үнемі қоғамның сұранысына сай пайда болады. Өмір үнемі дамып отырады. Осы салада жаңа қарым қатынастар пайда болады. Оларды реттеп отыру қажет. Заңдар да солай туады. Заңды Парламент қабылдады, Парламент ғана өзгерте алады. Яғни, Парламент бұл заңның күшін жоюы қажет деген шешім қабылдауы тиіс, – Мусин.
Бірінші президент туралы заң бойынша, ол жауапқа тартылмайтыны былай тұрсын, сонымен қатар, оны қамауға алуға, қарулы күзетпен күзетуге, тінтуге және тергеуге болмайды. Бұл ерекше құқық оның жеке мүлкіне және өзімен бірге тұратын отбасы мүшелеріне де берілген.
