Қазақстанда балалардың қауіпсіздігіне қатысты алаңдаушылық артып келеді. ҚР Бала құқықтары жөніндегі уәкілі Динара Закиева мәлімдегендей, жыл сайын елде кәмелетке толмағандарға қатысты шамамен 900 жыныстық қылмыс тіркеледі. Бұл көрсеткіш балалардың қорғалу деңгейінің әлі де төмен екенін көрсетіп, қоғамда үлкен резонанс тудырып отыр.
– ҚР Қылмыстық кодексінің 120, 121 және 124-ші баптары бойынша қарастырылатын бұл қылмыстарға қатысты жазалар күшейтілді. 2024 жылдың 16 маусымында күшіне енген әйелдер құқығы мен балалардың қауіпсіздігін қамтамасыз ету туралы заң аясында мұндай ауыр қылмыстарға қатысты жазалар қатаңдатылды. Заң күшіне енген уақыттан бастап қарастырсақ, осы ауыр қылмыстарды жасаған 25-27 адам өмір бойына бас бостандығынан айырылды, – дейді Динара Закиева.
Закиеваның айтуынша, бұл қылмыстарды көбінесе балалардың өз ортасындағы жақын адамдары, яғни туыстары, көршілері, туыстарының достары жасайды.
Сарапшылардың пікірінше, жыныстық қылмыстардың алдын алу үшін балаларды қауіпсіздік ережелеріне үйрету, ата-аналардың құқықтық сауаттылығын арттыру, сондай-ақ бақылау және қадағалау жүйелерін күшейту маңызды. Сонымен қатар, құқық қорғау органдары мұндай қылмыстарға қатысты жазаны қатаңдату мен құқықбұзушылықтың алдын алу шараларын белсенді түрде жүзеге асыруда.
Балалардың қауіпсіздігі – мемлекеттің басты міндеттерінің бірі. Қылмыстардың алдын алу үшін заңнамалық шаралармен қатар, қоғамның санасын өзгерту және әрбір баланың қорғалуын қамтамасыз ету маңызды. Бұл – бүкіл қоғам болып атсалысатын күрделі әрі маңызды міндет.
Парақшамызға жазылыңыз
