Алматы қаласында қараша айының 1 күні Ғ.Мүсірепов атындағы Қазақ мемлекеттік академиялық балалар мен жасөспірімдер театрының ұйымдастыруымен тұңғыш рет «35°» атты І Республикалық жастар театрлары фестивалінің ашылу салтанаты өтті. Іріктеліп алынған отандық 8 жас режиссердің қойылымы 1 апталық фестиваль барысында сахналанбақ. Minber.kz редакциясы іс-шараның өту барысымен танысып қайтты.
![](https://www.minber.kz/wp-content/uploads/2023/11/img_2953-1024x683.jpg)
Фестивальдің мақсаты — Қазақстандық режиссерлердің кәсіби шеберліктерін шыңдап, шығармашылық тәжірибе алмасуды қамтамасыз ету. Бұл бастамаға ҚР Мәдениет және ақпарат министрлігі қолдау көрсетті.
Еліміздің түкпір-түкпірінен 35 жасқа дейінгі талантты 30 режиссердің еңбегі іріктеуде бақ сынады. Оның 8-і атап айтқанда: Гүлназ Балпейісова, Мейрам Хабибуллин, Антон Зайцев, Әлібек Өмірбекұлы, Шағуан Үмбетқалиев, Анна Цой, Әридаш Оспанбаева және Шыңғыс Жақыпбайдың қойылымдары театр сыншыларының көңілінен шығып, фестивальға жолдама алды.
![](https://www.minber.kz/wp-content/uploads/2023/11/img_297-1024x683.jpg)
![](https://www.minber.kz/wp-content/uploads/2023/11/img_2918-1024x683.jpg)
Шараның ерекше тұстарын Ғ.Мүсірепов атындағы Қазақ мемлекеттік академиялық балалар мен жасөспірімдер театрының әдебиет бөлімі меңгерушісі, ҚР Мәдениет қайраткері, фестиваль ұйымдастырушыларының бірі Ақ-Зия Жайлы атап өтті:
«Әдетте фестивальдарда қатысушылар «Кім қандай жүлде алады екен?» деп өрек болып, екі ұдай күй кешеді. Бірақ бұл жолы іріктеуден өткен 8 театрдың барлығы — жеңімпаздар. Марапаттау рәсімі ең соңғы күні емес, дәл қазір ашылу салтанатында өтеді. Жүлделерді 8 жас режиссерге 8 қазақ режиссурасының абыз тұлғары, үлкен аға буыны табыстайды».
Үздік деп танылған режиссерлерге 1 000 000 теңге көлемінде ақшалай сыйлық табысталды. Ашылу салтанаты аяқталысымен қонақтар ішке өтіп, сахнада Фархат Молдағалиевтің «Құлагер» қойылымы көрсетілді.
![](https://www.minber.kz/wp-content/uploads/2023/11/img_831-1024x583.jpg)
Жас майталмандардың өнерін тамашалаймын десеңіз, алдағы уақытта қойылатын қойылымдар тізімін төменге келтіре кеттік.
![](https://www.minber.kz/wp-content/uploads/2023/11/img_625.jpg)
Әмина ЕРМЕКОВА
Парақшамызға жазылыңыз