Америкалықтар “Достықтан” үркіп отыр

Америка саясаткерлері Қытайдың «Достық» құбырынан қауіптеніп отыр. Түркменстаннан басталып, Қытайға тірелетін газ құбыры Түркменстан, Өзбекстан, Қазақстан және Қытайды басып өтеді. Қытайлықтар осы құбырды «Достық» құбыры деп атады. Америка қазір осы бір газ құбыры Еуропаға тасымалданатын Набукко жобасына кері әсер етеді деп санайды.
АҚШ Атлантикалық кеңесінің Еуразиялық энергетикалық орталығының директор орынбасары Александрос Петерсон осындай ойларын Trend Capital ресурсында жариялады.
Құны 8 млрд еуроға жуық болатын Набукко газ құбырының жобасы Каспий өңірінің газын Таяу Шығыс пен Еуропа елдеріне тасымалдауды қарастырады. Құрылысты 2011 жылы бастау жоспарланған. Құбырдың қуаты – жылына 31 млрд текше метр газ. Жобаға қатысушылар – австриялық OMV, венгриялық MOL, болгариялық Bulgargaz, румыниялық Transgaz, түркиялық Botas және немістің RWE компаниялары.
АҚШ саясаткері Александр Петерсонның айтуынша, Түркменстан заңнамасы қазіргі уақытта шетелдік компаниялар мен мемлекеттерге елдің аумағындағы газды игеруге тыйым салады. Алайда, Қытайлық CNPC – компаниясы мұндай құқыққа ие болған алғашқы компания.
Петерсонның айтуынша, батыс компаниялары өте баяу, ал Набукко консорциумының қазір қандай да тәсілдермен CNPC әрекетіне қарсы тұруға қуаты жоқ.
Асхат Сәрсенбайұлы