2013 жылы 9 сәуір күні қазақ өнері тарландарының бірі,
композитор, КСРО халық әртісі, Қазақ КСР Мемлекеттік сыйлығының лауреаты, профессор Еркеғали Рахмадиев 81 жасқа қараған шағында дүниеден озды.
Өнерімен талайды тамсандырған Еркеғали Рахмадиев 1932 жылдың 1 тамызында қазіргі Шығыс Қазақстан облысы Шұбартау ауданында дүниеге келген еді. 1957 жылы Алматы консерваториясын бітірген Е.Рахмадиев 1967 жылы Қазақ КСР өнеріне еңбек сіңірген қайраткер, 1976 жылы Қазақ КСР халық әртісі,1981 жылы КСРО халық әртісі атағын алған болатын. Оған 1980 жылы Қазақ КСР мемлекеттік сыйлығы да тапсырылыпты. 27 жыл бойы Қазақстан Композиторлар одағының төрағасы, КСРО Композиторлар одағының хатшысы болып қызмет еткен Еркеғали Рахмадиевтың «Қамар сұлу», «Алпамыс», «Тың тынысы», «Абылай хан» опералары, «Амангелді», «Толғау», «Дайрабайдың күйі», «Мейрам күні», «Құдаша-думан», «Ортпа» симфониялық поэмалары, «Сәлем саған Аястан», «Мерекелік кантата», «Конституция туралы поэма» кантаталары, хорға арналған вокалдық шығармалары, көптеген ән-романстары қалың көпшіліктің зор сүйіспеншілігіне бөленген еді. Қазақтың симфониялық күй жанрын қалыптастырып кеткен Еркеғали Рахмадиевке 2010 жылы «Қазақстанның Еңбек Ері» атағы берілді. Марқұммен қоштасу бейсенбі күні өтеді.
Топырағың торқа, иманың жолдас болсын, қадірменді Аға, бақұл бол!
Мінбер-ақпарат
Парақшамызға жазылыңыз
Ұлттық руханияттың жалғасып, жазампаздануына жан-тәнін аямай бар ғұмырын сарп еткен қадірменді ағаның жаны жаннатта болсын!
Аққу ұшып көлге кетті,
Сұңқар ұшып шөлге кетті
Ол бекерге кеткен жоқ
Бәріміз барар жерге кетті! Алды иманды, арты қайырлы болсын!