Әлем кубогінің финалында Аргентина мен Испания кездеседі. Бұл – тек алтын жүлде үшін тартыс емес, тұтас бір буынның арманы шындыққа айналған тарихи сәт.
Соңғы күндері әлеуметтік желілерде 2007 жылы түсірілген ерекше фотосурет қайтадан кеңінен таралып жатыр. Онда сол кездегі жас Лионель Месси қайырымдылық күнтізбесіне арналған фотосессия барысында құндақтағы Ламин Ямалды қолына ұстап тұр. Ол кезде ешкім бұл сәбидің арада жылдар өткенде футбол әлемінің ең жарқын жұлдыздарының біріне айналарын елестете алған жоқ.
Бүгінде Ламин Ямал Испания құрамасының көшбасшыларының бірі ретінде әлем кубогінің финалында дәл сол Мессиге қарсы алаңға шығуға дайындалып жатыр.
Алайда бұл оқиға тек Ямалмен ғана шектелмейді.
Испания құрамасындағы Пау Кубарси, Гави, Дани Ольмо, Жоан Гарсия секілді футболшылар да бала күнінен Лионель Мессидің ойынына сүйсініп өскен буынның өкілдері. Кейбірі онымен естелік суретке түсті, кейбірі қолтаңбасын алуды армандады, енді бірі оның әр қимылын қайталауға тырысты. Сол кезде олардың бәрі үшін Месси қол жетпес аңыз болатын.
Жылдар өте уақыт бәрін өзгертті.
Бала күнінде теледидар алдында отырып кумирінің ойынын тамашалаған жеткіншектер бүгінде әлем чемпионатының финалында сол футболшыға қарсы ойнауға мүмкіндік алып отыр. Бұл – спорттағы ең әсерлі әрі ең ерекше сәттердің бірі.
Футболдың құдіреті де осында. Ол армандарды шындыққа айналдырады. Кеше ғана шабыт сыйлаған адам бүгін сенің басты қарсыласыңа айналуы мүмкін. Бірақ нағыз құрмет ешқашан жоғалмайды.
19 шілдеде әлем назары тағы да бір тарихи финалға ауады. Бір жағында – өз дәуірінің символына айналған Лионель Месси. Екінші жағында – дәл оның ойынына қарап өскен жаңа буынның жұлдыздары.
Бұл тек Аргентина мен Испания арасындағы матч емес. Бұл – футбол дәуірлерінің тоғысы, аңыз бен оның ізбасарларының тарихи кездесуі.
Түгелбай Бисен
Парақшамызға жазылыңыз
