Ақпанның 20-сында vlast.kz сайты Женевада, Мәскеуде Тоқаевтың ұлына тиесілі жылжымайтын мүліктердің және Швейцария банкінде жасырын есепшоты бар екендігін, Еуропада 1998 жылдан бері жасырын байлығы болғандығы жөнінде жазды.
Credit Suisse жобасы 1998 жылы Тоқаевтың әйелі Надежда мен оның ұлы 14 жастағы Тимурдың атына Швейцария банкінде есепшот ашылғандығын әшкереледі делінген аталған мақалада.
Бүгін Президенттің баспасөз хатшысы Берік Уәли өзінің әлеуметтік желідегі парақшаларында бұның жалған ақпарат екендігін мәлімдеді:
“Кейбір бұқаралық ақпарат құралдары жазып жатқандай Мемлекет басшысы Қасым-Жомарт Тоқаевтың швейцариялық банкте қаржылық шоты жоқ. Сондай-ақ Президенттің шетелдік банктер мен офшорлық компанияларға да ешқандай қатысы болмаған және шетелде жылжымайтын мүлкі де жоқ.
Қасым-Жомарт Кемелұлының бұрынғы жұбайының да мақалада жазылғандай ешқашан қаржылық шоты болмаған.
Тимур Тоқаевқа келетін болсақ, жасы 38-де. Ол – кәсіпкер, ешқашан мемлекеттік қызметте істемеген.
Өздеріңіз білесіздер Президент экономика мен саясаттағы монополияны шектеуге, реформаларды жүзеге асыруға күш салып келеді. Бұл Мемлекет басшысының осындай шешімдерін жақтамайтын адамдардың әдейі таратып жатқан фейк ақпараттық шабуылы деп ойлаймын” делінген мәлімдемеде.
