Фото: pixabay.com
Қазақстандық жүк тасымалдаушылар енді Әзірбайжан, Түркия және Қырғызстан мемлекеттеріне кіруге арналған электронды рұқсат құжаттарын үйден шықпай-ақ онлайн рәсімдей алады, деп хабарлайды egov.kz
Бұл маңызды жаңашылдық elicense.kz порталында шетелдік рұқсат бланкілерін (ШРБ) алуға болатын бағыттар тізімінің кеңеюі арқасында мүмкін болып отыр. Анықтама үшін айта кетсек, шетелдік рұқсат бланкісі — отандық жүргізушілер мен компанияларға нақты бір шет мемлекеттің аумағында жүк тасымалдауға құқық беретін негізгі құжат болып табылады және мұндай рұқсаттар елдер арасында екіжақты келісім негізінде алмасылады. ҚР Жасанды интеллект және цифрлық даму министрлігі Мемлекеттік қызметтер комитеті төрағасының орынбасары Ержан Ақтаев атап өткендей, бұл қадам тасымалдаушылардың түрлі ведомстволарға бару уақытын қысқартып, жұмысқа көбірек көңіл бөлуіне жағдай жасайды. Бүгінде «Е-лицензиялау» платформасы мүмкіндігінше көп рұқсат беру процедураларын кезең-кезеңімен толық онлайн форматқа көшіру бағытында дамып келеді.
Аталған цифрлық қызметті көлік құралдары Қазақстан Республикасында ресми тіркелген және халықаралық автомобиль тасымалдарына арнайы рұқсаты бар отандық тасымалдаушылар, атап айтқанда, заңды тұлғалар мен жеке кәсіпкерлер кедергісіз пайдалана алады. Портал арқылы тапсырыс беру жолы барынша қарапайым әрі ыңғайлы жасалған. Мемлекеттік қызметті алу үшін пайдаланушы алдымен elicense.kz порталында авторизациядан өтіп, «Көлік» бөліміне өтуі тиіс. Одан кейін халықаралық келісімшарттарға сәйкес Қазақстан тасымалдаушыларына шет мемлекет аумағымен жүруге рұқсат беру қызметін таңдап, «Онлайн тапсырыс беру» батырмасын басады. Келесі кезекте тиісті өңірді немесе қаланы және РММ-ні белгілеп, ұйымның БСН-ін, өкілдің аты-жөні мен лауазымын, сондай-ақ заңды тұлғаның тіркеу деректері мен мекенжайын толтырып, «Келесі» батырмасын басу қажет. Сонымен қатар көлік құралы туралы мәліметтерді енгізіп, шетелдік рұқсаттарға деген қажеттілікті, яғни баратын мемлекеттің атауын, бланктің типі мен түрін, сондай-ақ нақты санын көрсету талап етіледі.
Өтінім жіберілгеннен кейін, ҚР Көлік министрлігінің ақпараттық жүйесі тексеріс жүргізіп, электрондық шетелдік рұқсат бланкісін автоматты түрде брондайды. Пайдаланушы тек тиісті мемлекеттік бажды төлеп, өтінімді электронды қолтаңба (ЭЦҚ) сияқты қолжетімді тәсілдердің бірімен растаса жеткілікті. Бұл мемлекеттік қызметті көрсету мерзімі небәрі 2 жұмыс күнін құрайды, одан кейін дайын құжат пайдаланушының elicense.kz порталындағы Жеке кабинетіне тікелей жолданады. Мұнда ескеретін маңызды жайт, бланктің жарамдылық мерзімі жеке кабинетке хабарлама түскен сәттен бастап 30 күн ішінде ғана күшінде болады. Қызметтің құны — әрбір бланк үшін 1 АЕК-ке тең.
Парақшамызға жазылыңыз
