Қостанай облысында соңғы күндері орын алған екі резонанстық оқиға өңірдегі идеология мәселесін әшкереледі. Қостанай қаласында Ресейдің әскери мерекесінің ашық тойлануы және Рудный қаласындағы ономастикалық өзгерістерге қарсылық – жергілікті биліктің ұлттық мүддені қорғаудағы дәрменсіздігін көрсеткендей.
Орталық алаңдағы «орыс флоты»
Шілденің 27-сі күні, Ресейде Әскери-теңіз флоты күні аталып өтіп жатқан тұста, Қостанай көшелерінде де мерекелік көңіл-күй байқалды. Үстеріне көк ала жейде (тельняшка) киген бір топ азамат көрші елдің туын көтеріп, әнұранын шырқап, қала ортасында емін-еркін серуендеген.
Жергілікті әкімдік бұл жағдайдан бейхабар болып шықты. Қалалық ішкі саясат бөлімінің басшысы Олжас Дүйсековтің сөзінше, шара туралы ешқандай ескерту болмаған. Билік өкілдері «түсіндіру жұмыстарын» жүргізіп,ұйымдастырушыны әкімшілік жауапкершілікке тартты. Алайда, қоғам белсенділері мұны жеткіліксіз деп санайды. Желі қолданушылары: «Бүгін бөтен елдің туын көтергендер, ертең сол елдің басшысының портретін алып шықса да, билік тек түсіндірумен құтыла ма?» деген уәж айтуда. Бұл жағдай Құмар Ақсақалов басқаратын өңірдегі ұлттық қауіпсіздік пен идеология саласының бақылаудан шығып бара жатқанын аңғартса керек.
Рудныйдағы «регламентке түкірген» тұрғын
Идеологиялық майданның тағы бір “қақтығысы” кеншілер қаласы – Рудныйда орын алды. Қала көшелерін қазақшалауға арналған қоғамдық тыңдау кезінде жергілікті тұрғын Екетерина Корчагина регламентті өрескел бұзып, мемлекеттік маңызы бар бастамаға ашық қарсылық білдірді.Оның айтуынша, қалада шешілмеген мәселе жетерлік, сондықтан әкімдік көше атауына бас қатырмауы тиіс.
«Регламенттеріңе түкіргенім (с..ать я хотела) бар! Менің анам осы қаланы өз қолымен тұрғызған адам. Сендер бәрін совет үкіметімен байланыстыра бересіңдер. Бірақ ұмытпаңдар, Рудный қаласы сол кеңестік кезеңнің арқасында салынды. Қала әлі де дамып жатыр. Жаңа көшелер мен нысандар салып, соларға қазақша атаулар бере беріңіздер. Әлия Молдағұлованың өзі де сол кеңес заманының өкілі екенін естен шығармаңыздар. Сондықтан мен бұл өзгеріске қарсымын», – деп эмоцияға салынған еді ол.
Мәслихат төрағасының шағымынан кейін полиция іске араласып, Коршагинаға қатысты «ұсақ бұзақылық» бабымен іс қозғады. Нәтижесінде,сот оған 20 АЕК (78,6 мың теңге) көлемінде айыппұл салды.
Айта кетерлігі, дауға қарамастан, Рудный мәслихатының депутаттары «50 жылдық Октябрь» көшесін – Достық, ал «Иван Франко» көшесін – Әлия Молдағұлова деп өзгерту туралы шешім қабылдады. Дегенмен, бұл шешімге «Аманат» партиясының мүшесі Валерий Гирфановтың қарсы дауыс беруі де көп нәрсені аңғартса керек.
Ақорданың реакциясы және сенаторлар ұсынысы
Сарапшылардың пікірінше, Қостанайдағы бұл оқиғалар тізбегі жай ғана кездейсоқтық емес. Бейресми дереккөздерге сүйенсек, Ақорда идеологтары облыс әкімі Құмар Ақсақаловпен «ауыр әңгіме» өткізуді жоспарлап отыр. Өңір басшысының идеологиялық саладағы олқылықтары орталық биліктің назарынан тыс қалмаған сыңайлы.
Осы орайда, Сенат депутаттары Нұртөре Жүсіп пен Еркін Әбілдің ономастикалық өзгерістер кезіндегі қоғамдық тыңдауларды алып тастау немесе оларды сарапшылар талқысына алмастыру туралы ұсыныстарының өзектілігі артып отыр.
Қостанай билігі үшін бұл оқиғалар – үлкен сабақ. Елдің егемендігі мен ақпараттық қауіпсіздігі нақты әрі батыл саяси қадамдармен қорғалуы тиіс.
Дереккөз: ErtenMedia
Парақшамызға жазылыңыз
