Желтоқсанның 2-сінде “Мінбер” журналистерді қолдау орталығының ұйымдастыруымен “Бизнестің әлеуметтік жауапкершілігін жазудың ерекшеліктері: ERG мысалында” тақырыбында Ақтөбе өңірінің журналистеріне арналған тренингтің үшінші күні аяқталды. Қатысушылар статистика агенттігі ұсынған ақпараттарды табу, өңдеу, Google және Yandex арқылы іздеудің артықшылықтары, індете іздеу дегеніміз не, тапқан мәліметтен дата стори жасаудың амалы қандай деген сұрақтарға жауап іздеді. Ақтөбе өңірінің журналистері өз өңірлеріне қатысты датаны іздеп тауып, одан қандай стори жасауға болатындығымен танысты. “Интернетте ұсынылған ақпараттың бәрін дата деу арқылы біз кейде қателікке ұрынамыз. Алайда дата арқылы гипотеза жасауға, оқиға табуға немесе ерекшелікті байқауға болады” дейді медиа тренер, Қазақстандағы Дата журналистика мектебінің негізін қалаушы Асхат Еркімбай. Шараға Ақтөбе өңірінде әртүрлі медиада қызмет етіп жүрген 20 журналист қатысуда. Шара ERG Komek корпоративтік қорының демеушілігімен жүзеге асуда.
