Мәдениет және Ақпарат министрі Аида Балаева “Масс-медиа туралы” заң жобасында екі жылдан бері талқыланып жатқан маңызды баптардың бірі жазылған дүниенің мерзімінің үш жылға дейін жарамды болуына қатысты өз пікірін білдірді.
Ол журналистердің және медиа қауымдастық өкілдерінің бұл мерзімді бір жылға дейін қысқарту туралы пікірлерін қолдайтындығын жеткізді. Бұл туралы ол 6 қазанда Орталық коммуникациялар қызметінде өткен брифингте айтқан.
“Біз мемлекеттік органдармен кешенді жұмыс жүргізіп, заң жобасынан материалдың ескіру мерзімін бір жылға дейін азайтуға қатысты сәтті келіссөздер жүргіздік. Мен журналистерді қолдаймын және материалдың ескіру мерзімін бір жылға дейін қысқартуды ұсынамын.
Алайда министр журналистік қауымдастық қарсылық танытып отырған пресс-картаны қолдайтынын білдірген.
“Пресс-картаны енгізуге қатысты – бұл механизмді біз қазіргі аккредитацияның баламасы ретінде енгізбекпіз. Бұл бірінші кезекте журналистер мен мемлекеттік органдардың өзара қарым-қатынасын жеңілдету үшін жасалмақ. Біз ақпараттық технологиялар ғасырында өмір сүреміз, оны журналистердің игілігіне қолдану қисынды болар еді”, – дейді министр.
Ал 6 қазанда Парламент Мәжілісінде өткен талқылауда депутаттардың біразы пресс картаға қарсы екендігін мәлімдеген еді.