Талдықорған қаласындағы Б.Римова атындағы драма театрында “Жапырақ жауған күз” атты поэтикалық кеш өтті. Жетісулық жеті ақынның қатысуымен өткен кеш Талдықорғандық көрермен үшін жаңа формада, театрландырылған көрініс ретінде ұсынылды. Поэтикалық сарыны ұқсас туындыларын кезек-кезек ұсынған ақындар сахнада тек өлең оқып қана қоймай лирикалық әндерді орындады. Кештің қоюшы-режиссері Назым Өтеулинова.
Жалпы соңғы бір екі жыл бедерінде жаңа ғимаратқа қоныс аударған Талдықорған театрындағы көрерменге де, өнер ұжымына да тың серпін берген спектаклдер ретінде жапон драматургы Минору Бэцякудің “Деніңіз сау ма?” абсурд жанрындағы драмасын және Серік Әбікенұлының “Орақты батыр” тарихи драмасын атауға болады. Жапон драматургының туындысы тақырыптық жағынан да, ойды жеткізу жағынан да Талдықорған театрының репертуарын жаңартты. Әрине абсурд жанрын қарапайым көрерменнің түсінуі қиын, дегенмен әр шығармадағы ойды әр көрермен өзінше тәпсірлейді десек, “Деніңіз сау ма?” қойылымның айтары көп. Бірін бірі тыңдаудан қалған, ешкім ешнәрсе үшін жауапкершілік алғысы келмейтін, тек өзінің ғана ішкі ойын тыңдаумен күн кешетін көрініс қай қоғамда да бар. Назым Өтеулинова қойған абсурд та соны айтқысы келіп еді.
Ал “Орақты батыр” секілді қойылымдар жұрттың тарихи жадын жаңғыртып қана қоймай, сананы сілкіп, рух оятады. Жас режиссер Ерлан Кәрібаев қойған тарихи драманың да көрерменге ой айту, оқиғаны баяндау стилі Талды театрындағы бұрнағы қойылымдардан ерекше. Ширақ, жұмыр.
Ал бүгінгі кеште ақындардың жазба поэзияны халыққа қағазбен емес сахна арқылы ұсынуы да Алматы облысының орталығындағы тұрғындардың өнерге деген ықыласын арттырғандай! Театр қашан да руханият ошағы. Адам жанына қажет рухани азықты тек кітап арқылы ғана емес, өзге де озық технологиялардың көмегімен алатын заманда өнерді халыққа ұсынудың түрлі тәсілі табылатыны белгілі. Талдықорған театрындағы біз айтқан үш жаңалық – бұл театрдың сахна өнеріндегі бәсекеге ілесе бастағанының айғағы.
Поэтикалық кеш өткізу туралы бастама көтерген Алматы облысы Мәдениет, архивтер және құжаттама басқармасының басшысы Марлен Кольбаев кеш соңында осындай поэтикалық кештің ендігі жерде үрдіске айналып, маусым сайын өтетінін айтты. Бұл үрдіс халыққа өңірдің ақындарын таныстырып қана қоймай, қазақ поэзиясының оқырманын көбейтеді деп сенеміз.
Парақшамызға жазылыңыз
